Пет деца кои боледуваат од хемофилија за една недела може да останат без терапија од која им зависи животот, предупредуваат од Здружението на хемофиличари на РМ. Во исто време шеесетина пациенти со хемофилија добиваат само ограничени количини од лековите.
Од здружението тврдат дека две години не се вршат ортопедски операции кај хемофиличари бидејќи тендерите доцнат и нема фактор со кои се запира крвавењето.
Кај овие пациенти најчесто се оштетуваат зглобовите и поради недостиг на овој крвен дериват тие се принудени да страдаат и трпат болки.
„ За децата со тешка форма на хемофилија кои примаат фактор 8 терапија има до крајот на месецот. Тендерот за набавка на овој лек се уште не е ни распишан.Последниве години тендерите доцнат од три до шест месеци. Зошто хронична болест како хемофилија која е животно загрозувачка и многу сериозна треба да зависи од тендери. Кога ќе започне крвавењето, не прашува дали тендерот е распишан или некаде заглавил во лавиринтот за системот. Затоа развиените земји имаат практични решенија за оваа болест кои не се поврзани со долги тендерски процедури“, велат од Здружението на хемофиличари, на Меѓународниот ден на хемофилија.
Од таму потенцираат дека донациите се само парцијално и моментално решение. Тие денеска излегоа да го одбележат Светскиот ден на хемофилија, но како што нагласија, не да слават бидејќи немаат за што да слават.
Од друга страна, државниот секретар Владимир Милошевски кој присуствуваше на прославата на здружението Хемолог, јавно вети дека ќе биде распишан тригодишен тендер за фактор за да нема недостиг во наредниот период.
Пациентите кои добиваат фактор за хемофилија се вклучени во Програма на Министерството за здравство. На почеток, пред18 години со оваа Програма беа опфатени 176 пациенти за набавка на фактор за хемофилија. Бројот на овие пацинети се зголемува и и во моментот се опфатени над 300 лица.
