Светската здравствена организација (СЗО) повика на целосна забрана на продажбата на живи животни на традиционалните пазари на храна во обид да се запрат идните епидемии на болести како коронавирусот.
СЗО ги повика сите влади да ја прекинат трговијата со „живи уловени диви животни од видовите цицачи“ што се продаваат покрај мртви животни на таканаречените мокри пазари, за да се намалат јавноздравствените ризици.
Телото на ООН претходно повика на подобрување на условите на ваквите пазари, но предупреди дека целосното затворање може да го прекине снабдувањето со храна.
Според заедничката студија на СЗО и здравствените власти во Кина за потеклото на епидемијата на ковид-19, пазарите на кои се продаваат и живи и мртви животни веројатно се изворот на епидемијата.
Иако во кинескиот град Вухан беа идентификувани првите случаи на заболени од новиот коронавирус, претставниците на СЗО се мачеа да утврдат како ја добиле инфекцијата.
Последната изјава на организацијата значи дека службениците веруваат дека влажните пазари претставуваат голем ризик за создавање нови вируси во иднина.
„Животните, особено дивите животни, се извор на повеќе од 70 проценти од сите појавени заразни болести кај луѓето, од кои многу се предизвикани од нови вируси“, се вели во соопштението на СЗО. „Особено дивите цицачи претставуваат ризик за појава на нови болести“.
