Првата дама на САД, Џил Бајден, им кажа на донаторите на кампањата дека не знае што се обидувал да добие специјалниот советник Роберт Хур кога рекол дека нејзиниот сопруг, американскиот претседател Џозеф Бајден, не може да се сети кога починал неговиот син Бо.
„Треба да имаме разбирање за сè и не можам да замислам дека некој би се обидел да ја искористи смртта на нашиот син за да освои политички поени“, напиша таа во е-пошта до донаторите на кампањата, пренесе АП.
Џил Бајден напиша дека членовите на јавноста можат само да замислат како се чувствувала кога читала за извештајот на Хур, не само како сопруга на Бајден, туку и како мајка на Бо.
Таа посочува дека ако некој доживеал ваква загуба, тогаш знае дека таа не се мери со години, туку со тага.
Специјалниот обвинител Роберт Хур претходно изјави дека претседателот не треба да се соочува со обвиненија за задржување документи и како хипотетичка одбрана го опиша тоа што 81-годишниот претседател има меморија која е маглива и лоша и има значителни ограничувања, додавајќи дека за време на интервјуто со истражителите, тој не можел да се сети пред колку години умрел неговиот најстар син Бо.
