Граѓаните на С Македонија за првпат се ставени на фундаментален тест пред претстојните избори – дали ЕУ-листата ќе остане победничка листа на Западниот Балкан, изјави министерот за надворешни работи Бујар Османи, оценувајќи дека политичкиот пејсаж во земјава никогаш досега не бил толку поларизиран како пред претстојните избори, создавајќи два кампуса – проевропски и антиевропски фронт.
Османи ова го изјави на панел-дискусијата на конференцијата „Позадината на дезинформациите: Зајакнување на нашите општества против манипулациите и мешањето на странските информации“, чиј домаќин беше високиот претставник на ЕУ за надворешна политика и безбедност Жосеп Борел во Брисел.
„Верувам дека ваквата парадоксална ситуација кога 80 отсто од граѓаните го поддржуваат членството во Европската Унија, а ние сè уште да се прашуваме дали ЕУ листата ќе биде победничка на изборите е последица на кампањата на дезинформации што доаѓа главно од Русија“ истакна Османи.
Ова, според Османи, е резултат на долгорочната кампања на Русија чија цел е одвлекување на земјите од Западен Балкан, вклучувајќи ја и С Македонија, од стратегиските цели. Шефот на македонската дипломатија оцени дека Русија стои зад сите обиди за поткопување на стратегиските цели на земјава како добрососедството и внатрешната кохезија во државата. Од таа гледна точка, оцени дека членството на земјава во НАТО е особено важно бидејќи, како што вели, како дел од одбранбениот чадор на Алијансата се зајакнува и отпорноста на дезинформациите.
Османи оцени дека Западниот Балкан е посебно подложен на манипулациите и мешањето на странските информации, а токму отворените прашања во земјите од регионот, го прават овој регион плодна почва за дезинформации, а тој како и пред 20 години, повторно станува линија на фронтот меѓу Западот и Русија.
„Руската агресија врз Украина ја зголеми свеста за ранливоста на Западниот Балкан. Токму и пред некој ден американскиот претседател Џо Бајден изјави дека ако Русија победи во војната во Украина, тогаш што ќе се случи со Западниот Балкан. Тоа го активира алармот за важноста на регионот и верувам дека клучната битка, дури и битката на наративи и дезинформации, ќе се води во Западниот Балкан“ изјави Османи.
Борбата со дезинформациите, како што кажа Османи, особено е присутна во С Македонија која застана во политичка, дипломатска и воена поддршка на Украина и целосно се усогласи со политиката на ЕУ на санкции поврзани со руската агресија, што земјата ја постави високо на листата на руските цели на хибридни закани.
„Тоа веднаш се почувствува во интернет сферата каде што се ширеа дезинформации за намалување на довербата во институциите и традиционалните медиуми, поттикнување на омразата меѓу луѓето, што во мултиетничка средина е многу чувствително, па дури и поттикнување на внатрешни судири и немири“, додаде Османи.
Справувањето со дезинформациите и манипулациите, како што оцени шефот на македонската дипломатија, мора да се темели на активна транспарентност и проактивност во оваа насока, поттикнување на медиумската писменост, разоткривање на дезинформациите и лажните вести и објавување на факти.
