Сметководителка од Охрид е осомничена за кражба на околу 75.000 евра од клиентите на нејзината фирма, информира МВР. На Б.Н. (41), против која СВР Охрид до Основното јавно обвинителство Охрид е поднесена кривична пријава се сомничи за компјутерска измама, проневера во службата и фалсификување на службена исправа.
Според полицијата, осомничената од 2011 до 2017 година, како сметководителка во сметководствено биро од Охрид, ја искористила својата службена положба и овластување и без знаење и одобрување од четири фирми клиенти на бирото од нивна сметка вршела плаќања на својата сметка. Таа извршила фалсификување на содржината на 369 оригинални изводи од електронските банкарства со внесување во нив на невистинити податоци.
На тој начин Б.Н. противправно присвоила парични средства доверени во службата, при што на четирите правни субјекти им нанела вкупна материјална штета од 4.591.611 денари. Таа ја искористила можноста што физички ги поседувала банкарските токени со корисничките имиња и лозинки на клиентите кои се наоѓале во просториите на сметководственото биро и и биле на располагање за вршење плаќања за нивни потреби.
