Рускиот претседател Владимир Путин и се закани на Европа со „сериозни последици“ доколку на Украина и се дозволи во иднина да користи прецизно оружје со долг дострел доставено од Запад против руската територија.
„Тие претставници на НАТО, особено во Европа и особено во малите земји, треба да разберат со што си играат“, рече Путин синоќа во главниот град на Узбекистан, Ташкент, на крајот од државната посета.
Тој навести дека Русија може да преземе воени контрамерки и рече дека особено помалите земји не треба да заборават дека нивните територии не се големи и дека се густо населени.
Путин, кој ја започна руската агресивна војна против Украина пред повеќе од две години, го обвини Западот дека продолжува со ескалацијата.
– Современите вооружени системи како што е ракетниот систем АТАКМС не се управувани од украински војници, туку од висококвалификувани експерти на НАТО врз основа на податоци од сателитски извидување – тврди тој.
Досега ова оружје главно беше насочено кон украинската територија окупирана од Русија.
Путин особено го критикуваше генералниот секретар на НАТО, Јенс Столтенберг, кој е за гаѓање воени цели на руска територија. Столтенберг се осврна на правото на Украина на самоодбрана.
Украина бара дозвола од САД и другите западни земји да користи ракети и крстосувачки ракети за да ја нападне Русија со цел поефективна борба против непријателот.
За овие напади Киев досега главно користеше дронови од сопствено производство. Досега, руската војска можеше да собере војници преку границата за нови напади на украинска територија или да бомбардира градови во близина на границата, како Харков, со авиони од безбедна позиција без практично никакво мешање.
Според Путин, таквото одобрување од западните земји би претставувало директна конфронтација меѓу Русија и Западот.
