На сите им е јасно дека ВМРО-ДПМНЕ на овие избори е блиску до мнозинство во парламентот, вели лидерот Христијан Мицкоски без да даде конкретен одговор на новинарско прашање што би било неуспех за партијата на претстојните двојни избори на 8 мај.
Според Мицкоски, она што се случило во првиот круг од претседателските избори на 24 април е успех, а верува дека во среда ќе имаат убедлива двојна победа и очекува граѓаните масовно да излезат
„Не би се изненадил ако имаме 61 пратеник. За мене неуспехот не е неуспех. За мене е успех пред се она што се случи во првиот круг“ рече Мицкоски денеска во изјава за медиумите по завршување на литургијата во Соборниот храм „Свети Климент Охридски“ во Скопје.
Мицкоски, денеска уште еднаш потврди оти е сигурен дека нивниот претседателски кандидат Гордана Силјановска-Давкова ќе биде идниот претседател на државата, а коалицијата „Твоја Македонија“ ќе има мнозинство во парламентот.
Мицкоски вчера, во телевизиско гостување, рече дека не сака да зборува за бројки, но очекува победа и напомена дека идната претседателка би имала повеќе од 500 илјади гласа, а ВМРО-ДПМНЕ и коалицијата „Твоја Македонија“ би имале 55 пратеници.
Со слични бројки Мицкоски излезе и во интервјуто за „360 степени“ на МРТ 1 каде рече дека резултатите од првиот круг претседателски избори претворени во пратенички места покажуваат 53 мандати за ВМРО-ДПМНЕ во новиот парламент, но нашите очекувања, додаде тој, се дека ќе имаме по еден пратеник плус во секоја изборна единица на парламентарните избори на 8 мај.
