Мери го зборот

Мери го зборот

Како штоф од кој облека ќе носиш

Мери го неколку пати

Оти што ќе исечеш и скроиш

Тоа за навек ќе си носиш

Та или стокмен убав чоек ќе бидиш

Или за потсмев ќе служиш

Мери го зборот

Мери го ко лек да е

Оти секој лек отпоќе даен

Знај и отров да биди

И наместо да излечи

Чоек в земја да го пикни

Мери го зборот

Мери го како состојки за јадење

За на трпеза ко ќе седниш

Со мерак да се сладиш

Оти преблаго ако е лошо ќе ти биди

Од пресолено гладен ќе останиш

Та ниту лезет ти ќе видиш

Ниту оние со кои на маса

Ќе сакаш да наздравиш

Мери го зборот

Онака како што се мери

Кога куќарка за птици градиш

Та отворот ако премал е

Пилето надвор в зима ќе измрзни

А голем ако е

Птица грабливка ќе можи да влези

Мери

Измери добро во срцето

И на уште еден кантар

На оној во душата зборот клај го

И пред да го изустиш

Во устата преврти го

За да видиш дали ќе ти горчи

Оти налет се’

Ако само го плукниш

И некого во збор лош удавиш

Оти малку на чоек му треба

За сила и крила да му дајш

Или в ковчег да го пикниш

Малку на секој од нас му треба

Да се удави во збор лош

Од немукает

Од злоба човечка

Затоа зборот се мери на кантари неколку

Оти ништо потешко на светов

Од збор поган нема

И ништо не сечи појќе

Од збор-сабја

Ништо поголем иљач не е

Од збор меден

Ете затоа зборот се мери

За да можеш чоек со него

Од мртвите да го вратиш

И насмев на усните да му ставиш

Оти малку треба

Многу малку треба

Од збор да се родиш

Или во зборот да умриш

Ана Бунтеска